10 వేల అడుగులా? 45 నిమిషాల వ్యాయామమా? ఏది ఉత్తమం!

మన శారీరక, మానసిక ఆరోగ్యం బాగుండాలంటే వ్యాయామం చాలా అవసరం. ప్రతి రోజు 10 వేల అడుగులు నడవాలి లేదా 45 నిమిషాల వ్యాయామం చేయాలని వ్యాయామ నిపుణులు సూచిస్తున్నారు. అయితే, చాలా మందికి వచ్చే అనుమానం.. ఈ రెండింట్లో ఏది చేస్తే మేలు అని. మరి దేని వల్ల ఎలాంటి ఫలితాలు ఉంటాయో తెలుసుకుందామా..

10 వేల అడుగులు

ఇదొక సులభమైన వ్యాయామం. చిన్నపిల్లల నుంచి పెద్దవాళ్ల వరకు ఎవరైనా చేయొచ్చు. రోజుకు 10 వేల అడుగులు నడవడం ద్వారా శరీరంలో రక్తప్రసరణ, జీర్ణ వ్యవస్థ మెరుగవుతాయి. గుండె ఆరోగ్యం బాగుంటుంది. ఒత్తిడి తగ్గి మానసిక ప్రశాంతత లభిస్తుంది. ఆలస్యమైనా బరువూ తగ్గుతారు. ఈ వ్యాయామం చేయడానికి ప్రత్యేకంగా ఎటువంటి పరికరాలు అవసరం లేదు. 

 అయితే, ఒకేసారి ఇంత దూరం నడవాల్సిన అసవరం లేదు. అడుగులను కొన్ని భాగాలుగా విడగొట్టి రోజులో వీలు కుదిరినప్పుడల్లా చేయొచ్చు. ఉదయం ఒక అరగంట/గంట నడవడంతోనే సగానికిపైగా టార్గెట్‌ పూర్తి చేసుకోవచ్చు. ఆఫీసులో లిఫ్ట్‌ ఎక్కే బదులు మెట్లమార్గం ఎంచుకోవడం, గంటకోసారి కుర్చీలో నుంచి లేచి 10 నిమిషాలు నడవడం వంటివి చేయొచ్చు. రాత్రి భోజనం చేసిన తర్వాత మరో పావుగంట నడిచి లక్ష్యాన్ని పూర్తి చేయొచ్చు. అడుగులు లెక్కించడానికి స్మార్ట్‌వాచ్‌లు ఉన్నాయి. మొబైల్‌ఫోన్‌లోనూ ఈ అప్లికేషన్స్‌ అందుబాటులో ఉన్నాయి.  

ఈ నడక వ్యాయామాన్ని మాత్రమే ఎంపిక చేసుకోవడం వల్ల కొన్ని నష్టాలున్నాయి. నడకతోనే కండరాలు బలంగా మారవు. ఫిట్‌గా అవడానికి ఎక్కువ సమయం పడుతుంది. అదీకూడా క్రమం తప్పకుండా నడక సాగించాలి. మధ్యలో ఆపేస్తే ఎలాంటి ఫలితం ఉండదు. మొత్తం మొదటికొస్తుంది. 

45 నిమిషాల వ్యాయామం

జిమ్‌లో వర్కౌట్స్‌, కార్డియో, సైక్లింగ్‌ వంటివి ఏవైనా చేయొచ్చు. ఈ 45 నిమిషాల వ్యాయామంతో తక్కువ సమయంలో ఎక్కువ క్యాలరీలు కరుగుతాయి. దీంతో తొందరగా బరువు తగ్గే అవకాశముంది. శరీరంలోని కండరాలు దృఢంగా మారడంతోపాటు శక్తి లభిస్తుంది. ఫిట్‌గా ఉండటంతో మానసిక ప్రశాంతత పొందుతారు. చక్కటి నిద్ర పడుతుంది. 

ఉదయం లేదా సాయంత్రం జిమ్‌కెళ్లి వ్యాయామాలు చేయడం, ఇంట్లోనే కార్డియో, యోగాసనాలు వంటివి చేయొచ్చు. సైక్లింగ్‌ చేస్తూ శరీరానికి శ్రమ కల్పించొచ్చు. అయితే, చాలా మందికి జిమ్‌కెళ్లి వ్యాయామం చేసేంత సమయం ఉండకపోవచ్చు. మరికొంత మందికి ఈ వ్యాయామాల వల్ల శక్తి లభించడం అటుంచితే రోజంతా అలసటగా అనిపిస్తుంటుంది.

ఈ వ్యాయామాలు ఎలా పడితే అలా చేసే వీలు లేదు. తేలిక పాటి వ్యాయామాల నుంచి క్రమంగా కఠిన వ్యాయామాలకు వెళ్లాలి. ఒకేసారి కఠినమైనవి చేస్తే ఇబ్బందులు ఎదురవుతాయి. జిమ్‌లో అయితే ట్రైనర్‌ శిక్షణ ఇస్తారు. ఇంటి దగ్గరే చేయాలనుకుంటే ఆన్‌లైన్‌లో వ్యాయామాలకు సంబంధించి అనేక వీడియోలు, మొబైల్‌ అప్లికేషన్స్ అందుబాటులో ఉన్నాయి. వాటి సాయం తీసుకోవచ్చు.  

ఈ రెండింట్లో ఏదీ ఉత్తమమంటే.. సాధారణ, నిలకడైన ఆరోగ్యం కోసం రోజూ 10వేల అడుగులు నడిస్తే సరిపోతుంది. అదే, కాస్త తొందరగా బరువు తగ్గాలి, కండరాలు దృఢంగా మారాలంటే 45 నిమిషాల వ్యాయామం ఉత్తమం. సంపూర్ణ ఆరోగ్యం, ఫిట్‌నెస్‌ కావాలంటే రెండూ చేయొచ్చు. ఏం చేసినా, క్రమం తప్పకుండా చేస్తేనే ఫలితముంటుందని గుర్తుంచుకోవాలి.