‘కాంతార’, ‘మహావతార్‌ నరసింహ’ జోరు.. ఆస్కార్‌ బరిలో మరో ముందడుగు

ఈ ఏడాది ఆస్కార్‌ (Oscar) బరిలో హోంబలే ఫిల్మ్స్‌ నిర్మించిన రెండు సినిమాలు పోటీపడనున్నాయి. ప్రతిష్ఠాత్మక ఈ అవార్డుల రేసులో ఉన్న కాంతార: చాప్టర్‌-1 (kantara chapter 1), మహావతార్‌ నరసింహ (Mahavathar Narasimha) చిత్రాలు మరో ముందడుగు వేశాయి. ఆస్కార్‌ అవార్డ్స్‌ల జనరల్‌ ఎంట్రీలో చోటు దక్కించుకున్నాయి. దీంతో ఉత్తమ నటుడు, ఉత్తమ నటి, ఉత్తమ డైరెక్టర్‌తో పాటు నిర్మాత, స్క్రీన్‌ప్లే, ప్రొడక్షన్‌ డిజైన్‌, సినిమాటోగ్రఫీ వంటి ఇతర కేటగిరీల్లోనూ ఇవి పోటీపడబోతున్నాయి. ఈ విషయాన్ని తెలుపుతూ హోంబలే ఫిల్మ్స్ ఎక్స్‌లో పోస్టు పెట్టింది. ఆస్కార్‌కు రెండు అడుగుల దూరంలో ఉన్నామని తెలిపింది.

ఇక 98వ ఆస్కార్‌ అవార్డుల వేడుక 2026 మార్చి 15న జరగనుంది (Oscars 2026). ఆస్కార్‌ కోసం పోటీపడనున్న చిత్రాల తుది జాబితాను 2026 జనవరి 22న ప్రకటించనున్నట్లు అకాడమీ వెల్లడించింది. లాస్‌ ఏంజెలెస్‌లోని డాల్బీ థియేటర్‌లో ఈ 98వ ఆస్కార్‌ వేడుక జరగనుంది. 2025 జనవరి నుంచి డిసెంబర్‌ వరకు విడుదలైన చిత్రాలు ఇందులో పోటీపడనున్నాయి.